Website Design: The Guwahati
আজি গড়গাঁৱত অনুষ্ঠিত হোৱা এক গুৰুত্বপূৰ্ণ সংবাদ মেলত অসম সন্মিলিত মহাসংঘৰ কাৰ্যকৰী সভাপতি মতিউৰ ৰহমানে টাই সাহিত্য সভাৰ সভাপতি ডা: হেমন্ত গগৈৰ সৈতে এক সংবাদ মেলত কয় যে —
অসমত খিলঞ্জীয়া মুছলমান সম্প্ৰদায়ৰ লোকসকলক কেৱল গৰীয়া-মৰীয়া-দেশী বুলি অভিহিত কৰাহে উচিত ।
মুছলমানৰ সংখ্যাগৰিষ্ঠতা দেখুৱাবলৈ গৰীয়া-মৰীয়া-দেশী সকলক বাঙালী ভাষী আৰু হিন্দী ভাষী বিহাৰী মুছলমানৰ সৈতে একাকাৰ কৰি খিলঞ্জীয়া জনগোষ্ঠীৰ মুছলমানসকলক চৰম অপমান আৰু অপদস্থ কৰি শত্ৰুৰ দৰে আচৰণ কৰি থকা কাৰ্য অতি নিন্দনীয় ।
২০০১ চনৰ লোকপিয়লত ধুবুৰী, গোৱালপাৰা, বৰপেটা, নগাঁও, কৰিমগঞ্জ আৰু হাইলাকান্দি জিলাত আৰু ২০১১ চনৰ লোকপিয়লত মৰিগাঁও, বঙাইগাঁও আৰু দৰং জিলাটো মুছলমান সংখ্যাগৰিষ্ঠ হোৱা বুলি কৈ আছে ।
কিন্তু এই কথা কেতিয়াও সঁচা নহয় । সকলো পক্ষই জনা উচিত যে নিভাজ অসমীয়া ভাষী তথা বিভিন্ন জনগোষ্ঠীয় সংস্কৃতি কঢ়িয়াই ফুৰা গৰীয়া-মৰীয়া-দেশী জনগোষ্ঠীৰ লোকসকল সদায় অসমীয়া ভাষী হিন্দু তথা বিভিন্ন জনজাতীয় সমাজৰ সৈতেহে একাত্ম-নিবিড় হৈ আছিল, আছে আৰু চিৰকাল থাকিব । তেনে ক্ষেত্ৰত উক্ত তিনিটা খিলঞ্জীয়া মুছলমান সম্প্ৰদায়ক বাঙালী ভাষী আৰু হিন্দী ভাষী মুছলমানৰ সৈতে সামৰি উক্ত ৯ খন জিলাত মুছলমান সংখ্যাগৰিষ্ঠ হৈছে বুলি অসমীয়া হিন্দু আৰু জনজাতীয় সমাজক ভিতিগ্ৰস্ত আৰু সন্ত্ৰাসিত কৰি বিজেপি-অগপৰ যৌথ চৰকাৰে অসমৰ হাজাৰ বছৰীয়া সাম্প্ৰদায়িক ঐক্য-সম্প্ৰীতি ধ্বংস কৰিবলৈ এই নিকৃষ্ট ষড়যন্ত্ৰ কৰি আছে । ঐক্যবদ্ধ অসমীয়া জাতি তথা অসমীয়া ভাষীক সম্প্ৰদায়ৰ মাজত অহৈতুক অশান্তি আৰু অবিশ্বাস গঢ়ি তুলিব পাৰিলে অসমীয়াসকল সংখ্যালঘু হৈ চিৰকালৰ বাবে শাসন ক্ষমতাৰ পৰা বঞ্চিত হৈ গোলামলৈ ৰূপান্তৰ হ’ব । অসম চৰকাৰৰ বিভিন্ন বিভাগত থকা সাম্প্ৰদায়িক মনোভাৱৰ বিষয়াসকলে এই নিকৃষ্ট জাতিধ্বংসী ষড়যন্ত্ৰত সাৰ-পানী যোগাই আহিছে । খিলঞ্জীয়া জনগোষ্ঠীসমূহে এই ভয়ানক ষড়যন্ত্ৰৰ কথা বুজা উচিত ভৱিষ্যত বংশধৰ সকলৰ সুৰক্ষাৰ স্বাৰ্থত । বৈধ-অবৈধ বাঙালী ভাষী হিন্দু-মুছলমান আৰু হিন্দী-নেপালী ভাষী লোকসকলক অসমত খিলঞ্জীয়া অসমীয়াৰ সৈতে সমান অধিকাৰ দি হাজাৰ বছৰীয়া খিলঞ্জীয়া নিজা ভাষা-দোৱান থকা জাতি-জনগোষ্ঠীসমূহক আৰু অসমীয়া ভাষিক খিলঞ্জীয়া সম্প্ৰদায়সমূহক চিৰদিনলৈকে নিজস্ব ভূ-খণ্ড তথা গৃহভূমিতে সংখ্যালঘু কৰি সকলো ক্ষমতা আৰু অধিকাৰৰ পৰা বঞ্চিত কৰি গোলামত পৰিণত কৰিবলৈকে এই ভয়ানক ষড়যন্ত্ৰ চলি আছে । উক্ত ৯ খন জিলাত বসবাস কৰি থকা গৰীয়া-মৰীয়া-দেশী জনগোষ্ঠীৰ খিলঞ্জীয়া মুছলমান সম্প্ৰদায় জনসংখ্যা আৰু বাঙালী-হিন্দীভাষী মুছলমান সম্প্ৰদায়ৰ লোকসকলৰ জনসংখ্যা পৃথক পৃথক কৈ উলিয়াই দিলেই সকলো কথা পৰিষ্কাৰ হৈ যাব বুলি ৰহমান আৰু গগৈয়ে দৃঢ়তাৰে কয় । অসমীয়া খিলঞ্জীয়া জনগোষ্ঠী সমূহক নিঃশেষ কৰিবলৈকে এই ভাগ ভাগ কৰা ষড়যন্ত্ৰ চলি আছে ।
অসমৰ সকলো খিলঞ্জীয়া জনগোষ্ঠী এই ক্ষেত্ৰত সজাগ আৰু সতৰ্ক হৈ থকা উচিত । আজি গড়গাঁৱত অনুষ্ঠিত গুৰুত্বপূৰ্ণ সংবাদ মেলত মতিউৰ ৰহমানৰ সৈতে টাই সাহিত্য সভাৰ সভাপতি ডা: হেমন্ত গগৈ উপস্থিত আছিল ।
( সংবাদ বিবৃতি)
